 |
|
Alissandru Caldiero parra e scrivi in sicilianu, in puisia e in prosa.
Vivi e travagghia in America, cu la Sicilia na la menti e na lu cori.
Tri sunnu li cordi di la chitarra d'Alissandru Caldiero; una, la prima, è malinconica, pi lu duluri di la Terra luntana;
una, chidda di lu menzu, è di pena pi lu statu prisenti di la Sicilia ca non ha saputu dàrisi un dignu guvernu autonumu
e pirchì ha trascuratu lu tisoru inestimabili di la so lingua; una, l'ultima e la chiù vicina a lu cori, trema di raggia pi la
vita stintata di li siciliani ca travagghianu nta paisi straneri.
Comu si po vidiri, - liggennu lu so libbru - la Sicilia è lu centru di la so puisia la surgenti di la so ispirazioni; e, na lu stissu tempu, lu so primu pinzeri.
Essiri sicilianu è misteri c'Alissandru ha jutu pirfiziunannu attraversu lu studiu di li nostri antichi pueti; di Venezianu e di Meli, di Tempiu e di Alessiu di Giuvanni,
di Scimunelli e di Martogliu; un misteri ca iddu ha jutu arricchennu macari cu la spirienza di li pueti nglisi e amiricani, chi canusci, ama e studia.
| POTETE FARE UNA DONAZIONE PER SOSTENERE UN PROGETTO DEL CSSSS |
